සැම මසකම පළවෙනිදා
අලුතින් පිටුවක් පෙරළා
සිහින් සිනහවක් පාලා
පරණ පිටුව ඉවත් කලා
රැකියාවෙන් ඉසුඹු ලබා
කල් ගෙවනා අප්පච්චී
පඩිය ලැබෙන දින සොයලා
රතු පාටින් රවුම් කළා
ටියුෂන් යන පොඩි නංගී
පංති පැවත්වෙන දිනයන්
සොයා බලා කල් ඇතිවම
දින දහයක් ලකුණු කළා
සායනයට රෝහල වෙත
යන බව අමතක වේ යයි
බියවුන අම්මා සැණෙකින්
එම දිනය ද ලකුණු කළා
කඨින පිංකමේ වැඩ ගැන
රැස්වෙන දිනය සොයා
ලොකු අයියා පොඩි අකුරින්
මොනවද ලියලා තිබුණා
මතකයන්ට මුවා වෙලා
කුරුටු ගෑව මගේ මුහුණ
අවලස්සන වෙලා කියා
මටම හිතෙනවා දැන්නම්
මාසය නිමවූ දිනයේ
මේ සියල්ල අමතක කර
මාව දමා කුණු කූඩෙට
නව පිටුවක් පෙරළනු ඇත
- ශ්රීමතී ගනේවත්ත
life1949313@gmail.com
මේ නිර්මාණය ගැන ඔබේ අදහස් මෙහි සටහන් කරන්න. කෙළින් ම ලේඛකයාට ඊ-මේල් මගින් දැන්වීමට අවශ්ය නම් ඉහත ඊ-මේල් ලිපිනය භාවිතා කළ හැක.
No comments:
Post a Comment
සහෘද පාඨක ඔබේ ප්රතිචාර ඉතා අගය කරමු. ස්තුතියි.