ඒ ප්‍රේමය - ෂර්මිලා බංදුනී දංවත්ත

හිඳිමි ඉඳහිට තවම
මැයි ගහ යට
පරණ බස් නැවතුමේ
වැඩ ඇරී පහට
ඔබ එතැයි

සාරි පොට ගෙල වටා ඔතාගෙන
දුරින් දුර අඩි තිය තිය
ඔබ ආවා ඒ දවස්වල
හරියටම වෙලාවට
නවත්තන බස් මගහැර
අපි ගියේ සෙනග අඩු බස්වල
එක ළඟින් ඉඳගෙන
කනට කර
කොඳුර කොඳුර

මම ආසයි අර වගේ සාරියකට
දවසක් ඔබ පෙන්නුවා
පෑල දිග අහස
සාරි කඩ පීර පීර
හෙව්වා අපි දෙන්නම
හමුවුණේ නැතුවට

ඔබට මාරුව
ගමටම ලැබෙනකොට
සතියයි තිබුණේ
මගේ මංගල්ලෙට

ඔන්න ඔහොමයි කන්තෝරු ප්‍රේමය
මතක්කර විටින් විට
හදවත රිද්දවන

- ෂර්මිලා බංදුනී දංවත්ත
sharmiladanwatte@gmail.com

මේ නිර්මාණය ගැන ඔබේ අදහස් මෙහි සටහන් කරන්න. කෙළින් ම ලේඛකයාට ඊ-මේල් මගින් දැන්වීමට අවශ්‍ය නම් ඉහත ඊ-මේල් ලිපිනය භාවිතා කළ හැක.